азаматтық қорғаныс күштерінің топтамасы


азаматтық қорғаныс күштерінің топтамасы
(Группировка сил гражданской обороны)
тиісті бастықтың шешімі бойынша зақым ошақтарында құтқару және шұғыл апаттық-қалпына келтіру жұмыстарын жүргізу үшін құрылатын топ. А.қ.к.т-н құру мен оның атқаратын жұмысы алдын ала жоспарланады. Мұнда жұмыс өңірлері мен объектілері анықталады, жұмысқа тартылатын күштер мен құралдардың құрамы, оларды дайындау тәртібі, жиналатын жерлері, жүру маршруттары, құтқару жұмыстарын жүргізуді қамтамасыз ету және басқаруды ұйымдастыру мәселелері нақтыланады. А.қ.к.т. аумақтық және объектілік жасақтардан, сондай-ақ қызмет жасақтарынан тұрады. Оның құрамына ауылдық аудандар мен қалалардың жасақтары да енгізілуі мүмкін. Құтқару жұмыстары барынша күшейтіліп, ауқымы кеңейтіледі және олар толассыз топтарға бөлініп, бірнеше ауысымдар мен резервтерден тұрады. А.қ.к.т. белгіленген іс-әрекетке жауап беруге және зақым ошағына тез кіруді, қысқа мерзім ішінде құтқару жұмыстарын жедел өрістетуді және оларды күштер мен құралдарды толық пайдалана отырып толассыз жүргізуді, құтқаруды басқаруға, өзара бірлесіп әрекет етуге қолайлы жағдай жасауды, күштер мен құралдарды жаппай зақымдаушы қарулардан қорғауды, т.б. қамтамасыз етуге тиіс.

Казахский толковый терминологический словарь по военному делу. — Мектеп.